சொந்தக் காணிகள் மற்றும் வீடுகளுக்கான உறுதிப்பத்திரம் அற்றோருக்கு அதனை வழங்க நடவடிக்கை..! - Sri Lanka Muslim

சொந்தக் காணிகள் மற்றும் வீடுகளுக்கான உறுதிப்பத்திரம் அற்றோருக்கு அதனை வழங்க நடவடிக்கை..!

Contributors
author image

Editorial Team

சொந்த காணிகள் மற்றும் வீடுகளுக்கான உறுதிப்பத்திரம் இல்லாத இலட்சக்கணக்கான மக்களுக்கு காணி மற்றும் வீட்டு உரிமையை சட்ட ரீதியாக வழங்க நடவடிக்கை எடுக்கப்படும் என பிரதமர் ரணில் விக்ரமசிங்க தெரிவித்துள்ளார்.

‘அனைவருக்கும் காணி’ திட்டத்தின் கீழ், காணியற்ற குடும்பங்களுக்கு காணி உரிமையை வழங்கும் நிகழ்ச்சி பிரதமர் அலுவலகத்தில் இன்று (24) காலை ஆரம்பமானது. இத்திட்டமானது சுற்றுலா மற்றும் காணி அமைச்சினால்இ காணி சீர்திருத்த ஆணைக்குழு மற்றும் காணி ஆணையாளர் நாயகம் திணைக்களத்தின் ஊடாக நடைமுறைப்படுத்தப்படுகிறது.

நாடளாவிய ரீதியில் காணிக்கான சட்டப்பூர்வ உரிமை இல்லாத சகலருக்கும் காணி உரிமையை வழங்குவதற்கான முதற்கட்ட நடவடிக்கையாக, இன்று முதல் உறுதிப்பத்திரங்கள் வழங்கப்படவுள்ளதாக சுற்றுலா மற்றும் காணி அமைச்சர் ஹரின் பெனாண்டோ தெரிவித்துள்ளார்.

காணிகளை இழந்தவர்களுக்கு சட்டப்பூர்வ உரிமை வழங்கும் நோக்கில் தயாரிக்கப்பட்ட இந்த வேலைத்திட்டத்தின் கீழ், ஒவ்வொரு வாரமும் 1000 முதல் 3000 வரையிலான உறுதிப்பத்திரங்களை காணி உரிமையாளர்களுக்கு வழங்குவதற்கு ஏற்பாடுகள் செய்யப்பட்டுள்ளதாக அமைச்சர் மேலும் தெரிவித்தார்.

இந்த வேலைத்திட்டத்திற்கு சமாந்தரமாக புத்தளம் மற்றும் குருணாகல் பிரதேச செயலகப் பிரிவுகளில் இன்று உறுதிப்பத்திரங்கள் வழங்கப்பட்டன.

உறுதிப்பத்திரங்கள் வழங்கும் நிகழ்வில் தொழிலாளர் மற்றும் வெளிநாட்டு வேலைவாய்ப்பு அமைச்சர் மனூஷ நாணயக்கார, காணி சீர்திருத்த ஆணைக்குழுவின் தலைவர் மற்றும் காணி ஆணையாளர் நாயகம் மற்றும் அதிகாரிகள் மற்றும் காணி உரிமை பெறுனர்கள் ஆகியோர் கலந்துகொண்டனர்.

Web Design by Srilanka Muslims Web Team