வடக்கு கிழக்கு இணைப்பு: முஸ்லிம்களுடனும் சம்பந்தப்பட்ட விடயம்
(விடிவெள்ளி)
அண்மைக்காலமாக தமிழ்த் தேசியக் கூட்டமைப்பு வடக்கு கிழக்கு மாகாணங்களின் இணைப்பைப் பற்றி பேசி வருகிறது. வடக்கு கிழக்கு இணைப்பு என்பது முஸ்லிம்களுடனும் சம்பந்தப்பட்ட விடயம் என்பதால் ஸ்ரீலங்கா முஸ்லிம் காங்கிரஸுடன் கலந்து பேசாமல் தமிழ் தேசிய கூட்டமைப்பு கருத்து வெளியிடுவது ஆரோக்கியமான விடயமல்ல என ஸ்ரீலங்கா முஸ்லிம் காங்கிரஸின் செயலாளர் நாயகமும் பாராளுமன்ற உறுப்பினருமான எம். ரி. ஹசன் அலி தெரிவித்தார்.
தமிழ்த் தேசிய கூட்டமைப்பின் தேர்தல் விஞ்ஞாபனத்தின்படி வடக்கு கிழக்கு இணைக்கப்படுவதற்கு ஸ்ரீலங்கா முஸ்லிம் காங்கிரஸ் ஆதரவளிக்குமா என்பது தொடர்பில் கருத்து வினவிய போதே ஹசன் அலி மேற்கண்டவாறு தெரிவித்தார். அவர் தொடர்ந்தும் கருத்து தெரிவிக்கையில், ஒரு அரசியல் கட்சி என்ற வகையில் தமிழ்த் தேசிய கூட்டமைப்புக்கு கருத்து வெளியிட உரிமை இருக்கிறது. என்றாலும் வடக்கு கிழக்கு இணைப்பு என்பது முஸ்லிம்களுடன் சம்பந்தப்பட்டதொன்றாகையால் முஸ்லிம்களுடன் கலந்து பேசி அவர்களின் அபிப்பிராயம் பெறப்பட்ட பின்பே கருத்துக்கள் வெளியிடப்பட வேண்டும். கிழக்கு மாகாண சபையில் ஸ்ரீலங்கா முஸ்லிம் காங்கிரஸே கூடிய சக்தியுள்ள கட்சியாக இருக்கின்றது. எனவே கிழக்கு மாகாணத்தில் பெரும்பான்மையாக வாழும் முஸ்லிம்களின் சிந்தனைகளுக்கு மதிப்பளிக்கப்பட வேண்டும்.
வடக்கு கிழக்கு இணைவதென்றால் முஸ்லிம்கள் பெரும்பான்மையாக வாழும் பகுதியில் தனியலகு வேண்டும். முஸ்லிம்களுக்கென்று தனியான அபிலாஷைகள் சிந்தனைகள் இருக்கின்றன. வட கிழக்கில் கணிசமான அளவு சிங்கள மக்களும் இருக்கிறார்கள். இவர்களது நிலைமை தொடர்பிலும் பேசித் தீர்க்கப்பட வேண்டியுள்ளது.
முஸ்லிம்களின் உரிமைகளுக்காக குரல் கொடுத்து வரும் முஸ்லிம் கட்சிகளில் பெரிய கட்சி முஸ்லிம்காங்கிரஸ் என்பதை தமிழ்த் தேசிய கூட்டமைப்பு அறிந்து வைத்திருக்கிறது. என்றாலும் வடக்கு கிழக்கு இணைப்பு பற்றி கருத்து வெளியிடும் போது முஸ்லிம்களின் கருத்துக்கள் பெறப்படாதிருப்பது கவலைக்குரிய விடயமாகும். இது தொடர்பாக தமிழ்தேசிய கூட்டமைப்பு கலந்துரையாடலுக்கு அழைப்பு விடுத்தால் முஸ்லிம் தரப்பு நியாயங்களையும் கோரிக்கைகளையும் முன் வைக்க முஸ்லிம் காங்கிரஸ் எப்போதும் தயாராகவே இருக்கிறது.
கிழக்கு மாகாண சபையில் 13ஆவது திருத்தச் சட்டத்தை பலப்படுத்துவது தொடர்பில் நிறைவேற்றியுள்ள பிரேரணையின் போதும் எமது கட்சி சில விடயங்கள் பற்றி எடுத்துச் சொல்லியிருக்கிறது. அபிப்பிராயங்களை வெளியிட்டிருக்கிறது. எனவே தமிழ்த் தேசிய கூட்டமைப்பு தனது சிந்தனைகளில் முஸ்லிம்களின் அபிப்பிராயங்களையும் உள்வாங்கிக் கொள்ளும் என்று நம்புகிறேன் என்றார்.-
