நாட்டு மக்களை மின்சாரக் கதிரையில் அமரச் செய்யும் வரவு-செலவுத் திட்டம். வாழ்க்கைச் செலவைக் குறைப்பதற்கு எந்தத் திட்டமும் இல்லை.ரணில்.
நாட்டின் 99 வீதமான சாதாரண மக்களின் மீது கடன் சுமை ஏற்றி வைக்கப்பட்டிருக்கின்ற நிலையில்
அவர்களை மின்சார கதிரையில் அமரச் செய்யும் வகையில் 2014 ஆம் ஆண்டுக்கான வரவு – செலவுத்திட்டத்தை அரசாங்கம் சமர்ப்பித்திருக்கின்றது. இத்தகைய வரவு செலவுத்திட்டத்தை ஐ.தே.க. எதிர்க்கின்றது என்று எதிர்க்கட்சித் தலைவர் ரணில் விக்கிரமசிங்க நேற்று சபையில் தெரிவித்தார். ஆறு எயார் பஸ்களை கொள்வனவு செய்வதற்காக பிரித்தானியாவுடன் உடன் படிக்கை மேற்கொள்வதன் மூலம் அந்நா ட்டுப் பிரதமர்
பிரதமர் கமரூனை சமாளித்து விடலாம் என்று அரசாங்கம் நினைப்பதாகவும் அவர் கூறினார்.
பாராளுமன்றத்தில் நேற்று வெள்ளிக்கிழமை 2014 ஆம் ஆண்டுக்கான வரவு செலவுத்திட்ட விவாதத்தை ஆரம்பித்து வைத்து உரையாற்றுகையிலேயே அவர் மேற்கண்டவாறு தெரிவித்தார்.
ரணில் விக்கிரமசிங்க இங்கு மேலும் கூறுகையில்,
அரசியலமைப்புச் சட்டத்தின் பிரகாரமே பாராளுமன்றத்தில் வரவு செலவுத்திட்டம் முன்வைக்கப்படுகின்றது. அந்த வகையில் 2014 ஆம் ஆண்டுக்கான ஐக்கிய மக்கள் சுதந்திர முன்னணி அரசாங்கத்தின் வருமானம் மற்றும் செலவினம் என்ற அடிப்படையிலான வரவு செலவுத் திட்டமும் முன் வைக்கப்பட்டுள்ளது.
அரசியலமைப்பின் 148 ஆவது சரத்து கூறுகின்ற அடிப்படையில் அரச நிதி நிர்வாகம் தொடர்பான அனைத்துப் பொறுப்புக்களும் பாராளுமன்றத்துக்கே இருக்கின்றன.
எனினும் கடந்த கால நிலைவரங்களை ஆராயும் பட்சத்தில் இந்த பொறுப்புக்கள் பாராளுமன்றத்துக்கு இருந்துள்ளனவா என்பது வருந்தத்தக்கதாகும்.
கடந்த பல வருடங்களில் வரவு செலவுத்திட்டமாக சமர்ப்பிக்கப்பட்ட ஆவணங்களில் இருந்து முற்றிலும் மாறுபட்ட தன்மையாகவே அரச வருமானங்களும் செலவினங்களும் இருந்துள்ளன என்பது வெளிப்படையான உண்மையாகும். இவற்றோடு ஒப்பிடுகையில் தற்போது சமர்ப்பிக்கப்பட்டுள்ள வரவு செலவுத்திட்டமும் உண்மையான தன்மைகளோடு சமர்ப்பிக்கப்பட்டிருக்கவில்லை என்பது தெரிகின்றது.
இம்முறை சமர்ப்பிக்கப்பட்டுள்ள வரவு செலவுத்திட்ட அறிக்கை 101 பந்திகளைக் கொண்டதாக எழுதப்பட்டிருக்கின்ற போதிலும் நாட்டு மக்களுக்கான நிவாரணம் எதுவும் இதில் பரிந்துரைக்கப்படவில்லை. வாழ்க்கைச் செலவினைக் குறைப்பதற்கு எந்த திட்டமும் கிடையாது. அரச ஊழியர்களுக்கான சம்பளம் அதிகரிக்கப்படவில்லை.
ஆனால் விவசாய, கால்நடை, நீர்ப்பாசனம், வன விலங்கு மற்றும் சுகாதாரத்துறைகளில் பணியாற்றும் அதிகாரிகளுக்கு 5 வருட தவணை முறையில் சைக்கிள் வழங்குவதற்கு யோசனை முன் வைக்கப்பட்டுள்ளது.
நாட்டை சுரண்டிக் கொண்டிருப்போர் லம்போகினி பெராரிபோன் அதி உயர் விலை கொண்ட வாகனங்கள் தீர்வை வரி விலக்களிப்புடன் தருவித்துக் கொள்ளும் நிலையில்தான் இம்மாதிரியான விடயங்களும் இடம் பெறுகின்றன. மேலும் லம்போகினி காரிலும் தரகுப்பணங்களை சுரண்டி பிழைப்பு நடத்துவோரும் உள்ளனர். அது மாத்திரமின்றி சைக்கிள்களிலும் தரகுப்பணம் கறக்கின்றனர்.
2013 ஆம் ஆண்டுக்கான வரவு செலவுத்திட்டமும் மக்களுக்கு எந்த நிவாரணத்தையும் வழங்கியிருக்கவில்லை. எனினும் திடீரென வரிகள் அதிகரிக்கப்பட்டன. இதனால் மின்சாரக் கட்டணத்துக்கு பாரிய அடிவிழுந்துள்ளது. இது போன்று எதிர்வரும் ஜனவரி மாதத்திலும் வரிகளை அதிகரிப்பதற்கான திட்டங்கள் தயாராகிக் கொண்டிருக்கின்றன.
பொது நலவாய அரச தலைவர்களது உச்சி மாநாடு என்ற திருமண வீட்டு விருந்துக்காக மக்கள் பணம் செலுத்த வேண்டிய நிலை உருவாகியுள்ளது. இதனால் நாட்டு மக்களின் வாழ்க்கை நிலை மேலும் கஷ்டத்துக்குள் தள்ளப்படுகின்றது.
இந்நிலையில் கடந்த வியாழக்கிழமை சமர்ப்பிக்கப்பட்ட வரவு செலவுத்திட்டமானது கடந்த வருடத்தின் போலியைப் போன்றே அமைந்திருக்கின்றது என்பதை சுட்டிக்காட்டி கூற முடியும். அந்த வகையில் 2014 ஆம் ஆண்டுக்கான அரசாங்கத்தின் வரவு செலவுத் திட்டமானது புஸ்வாணமாகியுள்ளது. இதில் நாட்டின் பொருளாதார நிலைமையின் உண்மைத்தன்மை பிரதிபலிக்கவில்லை.
இதுபோன்று தான் புள்ளி விபரங்களும் முன்மொழிவுகளும் நம்பிக்கையற்றவையாக இருக்கின்றன. இவற்றை நம்ப முடியாதுள்ளன. இத்திட்டமானது நாட்டு மக்களுக்கு எதிரானதாக அமைந்துள்ளது. எனவே இது மக்களையும் பாராளுமன்றத்தையும் ஏமாற்றுகின்ற வெறும் போலியான வரவு – செலவுத்திட்டமாகும்.
யுத்தம் நிறைவுக்கு வந்த 2009 ஆம் ஆண்டின் பின்னர் பாதுகாப்புக்கான நிதி குறைக்கப்பட்டு அந்த நிதி நாட்டின் அபிவிருத்திக்கென பயன்படுத்தப்படும் என்று அரசாங்கம் கூறியது. எனினும் பொருளாதாரத்தில் எந்தவித துரித வளர்ச்சியும் இடம்பெறவில்லை.
நாடு இன்று நாளுக்கு நாள் கடன் பொறிக்குள் சிக்குண்டு வருவதைத் தவிர வேறு எந்த முன்னேற்றமும் இல்லை. கடன் பெறுகையானது தொடர்ந்து கொண்டிருக்கின்றது. அரசாங்கத்தின் நிதி நிர்வாகம் இவ்வாறு அதிகரித்து வரும் அரச கடனில் தங்கியிருப்பதுடன் வெளிநாட்டு வர்த்தக கடன்களும் இவற்றில் அடங்குகின்றன.
2003ஆம் ஆண்டு ஐ.தே.க. ஆட்சிக் காலத்தில் 1.86 ட்ரில்லியன் ( ஒரு இலட்சத்து 86 ஆயிரம் கோடி) ரூபா அரச கடனாகவும் 843 பில்லியன் (84 ஆயிரத்து 300 கோடி) ரூபா வெளிநாட்டு கடனாகவும் செலுத்த வேண்டியிருந்தது.
எனினும் 2008 ஆம் ஆண்டில் அரசு கடன் 3.58 ட்ரில்லியனாகவும் (மூன்று இலட்சத்து 58 ஆயிரம் கோடி) வெளிநாட்டு கடன் 1.44 ட்ரில்லியனாகவும் (ஒரு இலட்சத்து 44 ஆயிரம் கோடி) ரூபாவாக அதிகரித்து பின்னர் 2013 ஆம் ஆண்டில் அரச கடன் 6.63 டிரில்லியனாகவும் ( ஆறு இலட்சத்து 63 ஆயிரம் கோடி ரூபா) வெளிநாட்டுக் கடன் மூன்று ட்ரில்லியனாகவும் (மூன்று இலட்சம் கோடி) அதிகரித்திருக்கின்றது.
யுத்தம் நிறைவடைந்திருக்கின்ற போதும் செலவினம் குறைந்து விடவில்லை. அரசாங்கமானது வெளிநாட்டுக் கடன்களை பெறுவதுடன் மாத்திரம் நின்று விடாது அதிகளவிலான வட்டிக்கு வர்த்தகக் கடன்களையும் பெற்று வருகின்றது.
வெளிநாட்டு தனியார் முதலீட்டாளர்களிடமிருந்து அதிக வட்டி வீதத்தில் குறுகிய கால அடிப்படையில் திறைசேரி உண்டியல்கள் மற்றும் பிணை முறிகளின் ஊடாக கடன்கள் பெறப்படுகின்றன. குறுகிய காலத்தில் அதிக இலாபம் ஈட்டுவதே அத்தகைய வெளிநாட்டு நிதி நிறுவனங்களின் பிரதான நோக்கமாகும்.
மத்திய வங்கியின் அறிக்கைக்கு அமைவாக 80 பில்லியன் ( 8 ஆயிரம் கோடி) ரூபா பெறுமதியான திறைசேரி உண்டியல்களையும் 317 பில்லியன் (31 ஆயிரத்து 700 கோடி) ரூபா பிணை முறிகளையும் வெளிநாட்டு தனியார் முதலீட்டாளர்கள் உரிமையாக்கிக் கொள்கின்றனர்.
அந்த வகையில் நாட்டைக் காட்டிக் கொடுத்திருப்பது யார் என்பது தெளிவாகின்றது.
அன்று டொன் ஜூவான் தர்மபால அரசர் நாட்டை பகுதி பகுதியாக போர்த்துக்கேயர்களுக்கு காட்டிக் கொடுத்தது போன்று எமது தேசிய கடனில் பகுதி பகுதியாக வெளிநாட்டு தனியார் முதலீட்டாளர்களுக்கு காட்டிக் கொடுத்துள்ளனர்.
அரசு மென்மேலும் வெளிநாட்டு தனியார் முதலீட்டாளர்களிடமிருந்து கடன் பெறுவதில் தங்கியிருப்பதால் இதன் சதவீதம் அடுத்தடுத்த வருடங்களில் 50 சதவீதம் வரை அதிகரிக்கும் வாய்ப்புள்ளது. இத்தகைய நிலைமையால் கிறீஸ் நாடு எதிர்கொண்ட பொருளாதார நெருக்கடியைப் போன்று இலங்கையும் எதிர் கொள்ளும் சாத்தியம் எழுந்துள்ளது.
வருமானம் ஈட்டிக்கொள்வதற்கு எந்த திட்டமும் இல்லாத காரணத்தால் கடன்களை செலுத்துவதற்கென்று வரிகளை அதிகரிப்பதன் மூலம் வருமானத்தை ஈட்ட அரசு முற்படுகின்றது. இதனால் உழைக்கும் மக்களின் குடும்பங்கள் மீதே தாங்கிக் கொள்ள முடியாத அளவில் சுமைகள் ஏற்றி வைக்கப்பட்டுள்ளன.
கடந்த பல வரவு செலவுத்திட்டங்களிலும் கூட குறைந்த வருமானம் பெறும் மக்களின் வருமானத்தை அதிகரிக்க நடவடிக்கை எடுக்கவில்லை. அதேபோன்று தான் ஜனாதிபதியின் 9 ஆவது வரவு செலவுத்திட்டமும் அமைந்திருக்கின்றது.
அரசாங்கமானது வெளிநாட்டுக் கடன்களின் ஊடாக மனித வளங்கள் விவசாயம், கைத்தொழில் போன்றவற்றை அபிவிருத்தி செய்வதற்குப் பதிலாக வீதி அபிவிருத்திகளையே மேற்கொண்டு வருகின்றது. கைத்தொழில் உற்பத்திகளை அபிவிருத்தி செய்யாது நெடுஞ்சாலை, ரயில் பாதைகள், விமான நிலையங்கள் மற்றும் துறைமுகங்களை அபிவிருத்தி செய்வதில் எந்த பயனும் கிடையாது.
ஸ்ரீலங்கன் எயார் லைன்ஸ் சேவை இலாபம் ஈட்டாதிருக்கின்ற நிலையில் மிஹின் லங்கா சேவையின் நட்டமும் ஸ்ரீலங்கன் எயார் லைன்ஸ் மீதே சுமத்தப்படுகின்றது. இவ்வாறு கோடிக்கணக்கில் நட்டம் ஏற்பட்டிருக்கின்ற போது மேலும் ஆறு எயார் பஸ்களை கொள்வனவு செய்வதற்கும் ரோல்ஸ் ரொய்ஸ் இயந்திரங்களை கொள்வனவு செய்வதற்கும் நடவடிக்கை மேற்கொள்ளப்பட்டுள்ளது. இதில் ரோல்ஸ் ரொய்ஸ் இயந்திரம் கொள்வனவு செய்வதற்கு மட்டும் 800 மில்லியன் அமெரிக்க டொலர் கடன் பெறப்பட்டுள்ளது.
பிரித்தானிய நிறுவனங்களுடன் இவ்வாறு ஒப்பந்தங்களை செய்து கொள்வதன் மூலம் பிரித்தானிய பிரதமர் டேவிட் கமரூனை சமாளித்துக் கொள்ள முடியும் என்று அரசாங்கம் எதிர்பார்க்கின்றது.
பிரித்தானிய பிரதமர் டேவிட் கமரூன் இலங்கை வந்து அவருக்கு தேவையான விடயங்களை நிறைவு செய்து கொண்டு சென்று விட்டார்.
டேவிட் கமரூனினாலோ அல்லது ஸ்ரீலங்கன் எயார் லைன்ஸ் ஒப்பந்தத்தினாலோ இலங்கைக்கு எந்த நன்மையும் கிடைக்கப்போவதில்லை. ஒப்பந்தத்தின் தரகுப்பணம் மூலம் சிலரது பொக்கட்டுக்கள் நிரம்புகின்றன. இதனால் ஏற்பட்ட கடன் சுமைகளையும் மக்களே தாங்க வேண்டியுள்ளது.
நாட்டை சுரண்டிப்பிழைக்கும் ஒரு சத வீதத்தினரின் சுமையை 99 சதவீதமான மக்கள் மீது சுமத்துவதை நாம் ஏற்றுக்கொள்ள முடியாது. இதனை நாம் எதிர்க்கின்றோம். மக்கள் மீது ஏற்றி வைக்கப்படுகின்ற அனைத்து சுமைகளையும் வீழ்ச்சியடையச் செய்வதற்கு நாம் அர்ப்பணிப்புடன் செயற்படுவோம்.
21 ஆம் நூற்றாண்டில் நாடு முன்னேற்றம் காண வேண்டுமெனில் நாட்டு மக்களை அறிவிலும் சுதந்திரத்திலும் பொருளாதாரத்திலும் பலப்படுத்த வேண்டியது அவசியமாகும். சமூக நியாயத்தை அடிப்படையாக கொண்டு சமூகப் பொருளாதாரத்தை நோக்கி பயணிக்க வேண்டும். டென்மார்க், ஜேர்மனி, சுவீடன், ஜப்பான் போன்ற நாடுகள் இந்த வழியிலேயே பயணிக்கின்றன.
மஹிந்த ராஜபக் ஷ அரசாங்கம் வரவு செலவுத்திட்டங்களை சமர்ப்பித்துள்ளது. ஆனால் உணரக்கூடிய வகையில் வருமானம் அதிகரிக்க வில்லை. அனைத்திலும் ஒரு சதவீதமானோர் செல்வந்தராயினர் 99 சதவீதமானோர் ஏழைகளாயினர். சாதாரண மக்களை மின்சார கதிரைக்கு அனுப்பும் வரவு செலவுத் திட்டமாகவே இது அமைந்துள்ளது. எனவே அத்தகைய வரவு செலவு த்திட்டத்தை ஐ.தே.க. எதிர்ப்பதுடன் திட்டத்திற்கு எதிராக வே வாக்குகளையும் அளிக்கும் என்றார்.tn
