வடக்கில் முஸ்லிம்களின் மீள்குடியேற்றத்திற்கு வடமாகாணசபை பூர ண ஒத்துழைப்பு வழங்க வேண்டும் – ஹுனைஸ் பாரூக்
வடக்கில் முஸ்லிம்களின் மீள்குடியேற்றத்திற்கு வடமாகாணசபை பூர ண ஒத்துழைப்பு வழங்க வேண்டும். இது விடயத்தில் முதலமைச்சரை முழுமையாக நம்பலாம் என வன்னி மாவட்ட பாராளுமன்ற உறுப்பினரும் அகில இலங்கை முஸ்லிம் காங்கிரஸின் பிரதித் தேசிய அமைப்பாளருமான ஹுனைஸ் பாரூக் தெரிவித்தார்.
வடக்கிலிருந்து முஸ்லிம்கள் வெளியேற்றப்பட்டு 23 வருடங்கள் நிறைவடைந்திருக்கும் நிலையில் அம்மக்களின் மீள்குடியேற்றம் தொடர்பில் கேட்டபோதே அவர் இவ்வாறு தெரிவித்தார்.
இது தொடர்பில் அவர் மேலும் தெரிவிக்கையில்,
1990 ஆம் ஆண்டு ஆயுதம் தாங்கிய விடுதலை புலிகளினால் முஸ்லிம்கள் பலவந்தமாக வடக்கிலிருந்து வெளியற்றப்பட்டு 23 வருடங்கள் நிறைவடைந்தும் அது இன்னும் கசப்பானதொரு சம்பவமாகவே இருக்கிறது. இவ்வாறு முஸ்லிம்கள் வெளியேற்றப்படும் போது சாதாரண தமிழ் மக்கள் கண்ணீர் விட்டு அழுத நிகழ்வும் எம் மனதில் இருந்து இன்னும் நீங்கவில்லை.
முஸ்லிம்களின் வெளியேற்றத்தை எம்மால் மறக்கவும் முடியாது. மன்னிக்கவும் முடியாது, மட்டுமன்றி அப்பாவித் தமிழ் மக்கள் எமக்காக கண்ணீர் சிந்தியதையும் எம்மால் ஒருபோதும் மறக்க முடியாது.
வடக்கில் கூட்டமைப்பு ஆட்சியமைத்திருக்கிறது. அக்கூட்டமைப்பில் பல கட்சிகள் இருக்கின்றன. எனினும் முதலமைச்சர் ஆயுத கலாசாரத்திலிருந்து விலகி நிற்பவர். அவர் ஒரு பொதுநிலைவாதி எனவே முஸ்லிம்களின் மீள்குடியேற்ற விடயத்தில் அவரை முழுமையாக நம்பலாம்.
கூட்டமைப்பு கடந்த காலங்களில் முஸ்லிம்களின் மீள்குடியேற்றத்தில் விருப்பமில்லாத தன்மையையே கடைபிடித்து வந்துள்ளது. அதன் உறுப்பினர்கள் பலர் முஸ்லிம்களின் மீள்குடியேற்றத்திற்கு எதிர்ப்பை காட்டியுள்ளனர்.
வடக்கிலிருந்து முஸ்லிம்கள் வெளியேற்றப்பட்டு 23 ஆண்டுகளாகின்றன. இப்படி ஒவ்வொரு வருடங்களையும் என்னிக்கொண்டே இருக்க வேண்டிய நிலை ஏற்பட்டிருந்தது. இனி அவ்வாறானதொரு நிலை ஏற்படக்கூடாது. 24 வருடங்கள் பூர்த்தியாகி விட்டதென்று அடுத்த வருடம் கூறும் நிலைமை ஏற்படுவதை தடுக்க வேண்டும்.
கடந்த ஆண்டு 22 ஆம் வருட முஸ்லிம்களின் வெளியேற்ற நினைவு தின நிகழ்வொன்றின்போது பொருளாதார அபிவிருத்தி அமைச்சர் பஷில் ராஜபக்ஷ உரையாற்றுகையில் ‘ அடுத்த வருடத்திற்குள் முஸ்லிம்கள் முழுமையாக மீள்குடியமர்த்தப்படுவர்’ என தெரிவித்ததிருந்தார். எனினும் துரதிஷ்டவசமாக அது நிகழவில்லை. ஆனால் அடுத்த ஆண்டுக்குள் அதனை சாத்தியப்படுத்த வேண்டும்.
இதேவேளை அடுத்த வருடத்திற்கான வரவு செலவு திட்டத்தின் போது இடம்பெயர்ந்த மக்களுக்கு நிதி ஒதுக்கீடு வழங்க வேண்டும் என்பது தொடர்பில் ஜனாதிபதியுடனான கலந்துரையாடலில் நான் ஆலோசனைகளை முன்வைத்துள்ளேன். குறிப்பாக கடந்த காலங்களில் புதிய அகதிகள் பழைய அகதிகள் என பிரிக்கப்பட்டு மீள்குடியேற்றப்படும் மக்களுக்கான உதவித்திட்டத்தின் போது பாரபட்சம் காட்டப்பட்டது. எனினும் அடுத்த வருடத்திற்கான நிதி ஒதுக்கீட்டின்போது பழைய அகதிகளுக்கான உதவித் தொகைக்கு அதிக நிதியை ஒதுக்கித்தருமாறு ஜனாதிபதியிடம் வேண்டுகோள் விடுத்துள்ளேன். இது தொடர்பில் அவர் கவனம் செலுத்துவதாக கூறியிருந்தார்.
பழைய அகதிகள் எனும் போது 1990 ஆம் ஆண்டும் அதற்கு முன்னரும் வெளியேற்றப்பட்ட முஸ்லிம்கள் அடங்குவர். அத்தேடு இறுதிக்கட்ட யுத்தத்திற்கு முன்னர் இடம்பெயர்ந்த தமிழர்களும் சிங்களவர்களும் நன்மையடைவர் என்றார்.
