2022 – LPL தொடர் இன்று ஆரம்பம்!
மூன்றாவது லங்கா பிரீமியர் லீக் (LPL) டி20 கிரிக்கெட் தொடர் ஹம்பாந்தோட்டையில் இன்று (06) ஆரம்பமாகவுள்ளது.
மொத்தம் ஐந்து அணிகள் பங்கேற்கும் இந்தத் தொடரில் 42 இலங்கை வீரர்கள் மற்றும் 30 வெளிநாட்டு வீரர்கள் இடம்பெற்றுள்ளனர். இதில் நடப்புச் சம்பியனும் தொடர்ந்து இரண்டு முறையும் கிண்ணத்தை வென்ற அணியுமான ஜப்னா கிங்ஸ் அணி திசர பெரேரா தலைமையில் களமிறங்குகிறது.
கடந்த முறை இறுதிப் போட்டிக்கு முன்னேறிய கோல் கிளாடியேட்டர்ஸ் அணிக்கு குசல் மெண்டிஸும், கொலொம்போ ஸ்டார்ஸ் அணிக்கு அஞ்சலோ மத்தியுஸும், தம்புல்ல அவுரா அணிக்கு தசுன் சானக்கவும் கண்டி வொரியர்ஸ் அணிக்கு வனிந்து ஹசரங்கவும் தலைவராக செயற்படவுள்ளனர்.
வெளிநாட்டு வீரர்களில் அதிகபட்சமாக பாகிஸ்தானின் எட்டு வீரர்கள் இடம்பெற்றுள்ளனர். மேற்கிந்திய தீவுகள் மற்றும் ஆப்கான் அணிகளைச் சேர்ந்த தலா ஆறு வீரர்கள் இடம்பெற்றுள்ளனர்.
ஆரம்பப் போட்டிகள் ஹம்பாந்தோட்டையில் நடைபெறவுள்ளதோடு தொடர்ந்து பல்லேகலவிலும் பின்னர் இறுதிக் கட்டப் போட்டிகள் கொழும்பு, ஆர். பிரேமதாச மைதானத்திலும் நடைபெறவுள்ளன. தொடரின் இறுதிப் போட்டி டிசம்பர் 23ஆம் திகதி நடைபெறும்.
